Sunday, October 30, 2005

மெர்க்குரிப் பூக்கள்-9 : யெட்டி கடற்கரை

கன்தாபை ஒட்டியிருக்கும் யெட்டி கடற்கரையைப் பற்றிக் குறிப்பிட்டிருந்தேன். ரூவியிலிருந்து குறும் (Qurum) செல்லும் வழியில் ஹம்ரியா (Hamriyah) ரவுண்ட்-அபவுட் (Round-about : ரவுண்ட்டானா-வை மஸ்கட்டில் ரவுண்ட்-அபவுட் என்று குறிப்பிடுகிறார்கள். அமெரிக்காவில் ரோட்டரியாம்-Rotary)டில் இடது பக்கமாக ரூவி பஜாருக்குச் செல்லும் சாலையில் நுழைந்து சென்றால் ஒரு கி.மீ. தூரத்தில் வலதுபுறம் பிரியும் சிறிய சாலையைப் பிடிக்கவேண்டும். சந்தடியான அந்தச் சாலையில் அரை கி.மீ. போனதும் எதிரே உயர்ந்திருக்கும் செம்மலை கண்ணுக்குத் தெரியும். ஒரு சிறிய வேகத்தடைக்குப் பின்னர் சாலை ஒரு கொண்டை ஊசி வளைவில் சரேலென்று மேலேறும்.

2000-ஸிஸி திறனுள்ள என் கார் முதல் கியரில் கூட அந்த வளைவில் ஏறச் சிரமப்படும். அந்த வளைவில் துவங்கி மலைத்தொடர்களினூடே கிட்டத்தட்ட 20 கி.மீ. தூரம் பயணித்தால் - இரு புறம் மொட்டை மலைகள்; நடுவே ஒரு பாலைவனச் சோலை; ஏராளமான வளைவுகள் என்று அனைத்தையும் கடந்து - ஆரம்பித்தது போலவே சரேலென்று இறங்கி யெட்டி கிராமத்தை அடையலாம். கிராமத்தை ஊடறுத்துச் செல்லும் சாலையில் தொடர்ந்து சென்றால் மிகப் பெரிய; சுத்தமான; அவ்வளவாக ஆள் நடமாட்டமில்லாத அழகிய யெட்டி கடற்கரை. ஆங்காங்கே நிறுத்தப்பட்டிருக்கும் மீனவர்களின் படகுகளையும் ஓரிரண்டு கட்டிடங்களையும் சில கார்களையும் கடற்பறவைகளையும் தவிர வேறு எதுவும் இல்லாத அமைதிப் பகுதி.

கன்தாப்பிற்குச் சற்று முயற்சித்தால் சைக்கிளில் கூடச் சென்றுவிடலாம் என்பதால் கூட்டம் எப்போதும் அம்மிக் கொண்டிருக்கும். மேலும் அது 15 நிமிடப் பிரயாணம். ஆனால் யெட்டி போய்ச்சேர குறைந்த பட்சம் அரை மணி நேரம் ஆகும். அதுவும் புல்லரிக்க வைக்கும் வளைவுகள் நிறைந்த பிரயாணம் என்பதால் பேருந்தில் பயணித்தாலே 'வாயில வரும்' ஆசாமிகளுக்கு யெட்டி பிரயாணம் ஒத்து வராது. வண்டி நடுவில் கோளாறாகி நின்றால் உதவி கிடைப்பதற்கும் நீண்ட நேரமாகிவிடும். மேலும் மலைகளினூடான சாலை என்பதால் சீக்கிரம் இருட்டியும் விடும். இந்த இன்னல்களுக்காகவே கூட்டம் வருவதில்லை.

நான் பொதுவாக இந்த மாதிரி இடங்களைத் தேடித்தேடிப் போகும் ஆசாமி. மதுரையில் வசித்த போது கொடைக்கானலுக்குப் போக வேண்டுமென்றாலும் - உலகமே கோடைக்காலத்தில் அங்கு குவிந்திருக்க - நான் மார்கழிக் குளிர் நடுக்கி எடுக்கும் நவம்பர் டிசம்பர் மாத காலகட்டத்தில்தான் செல்வேன். அதுவும் மாப்பிள்ளை விநாயகரில் இரண்டாம் ஆட்டம் பார்த்துவிட்டு, பிள்ளையாரைக் கும்பிட்டுவிட்டு, பின்னிரவு ஒரு மணிக்குக் கிளம்பி, அதிகாலையில் மூஞ்சிக்கல்லை அடைவேன் - என்னுடைய யெஸ்டி வண்டியில்!! நிற்க.

யெட்டி கடற்கரை நீண்ட அகண்ட கடற்கரை. வழக்கம் போல மலையடிவாரத்தில் துவங்கினாலும் மிகப்பரந்த மணல்வெளியுள்ள கடற்கரை. கால்கள் புதையும் மணலில் அரை கி.மீ. தூரம் நடந்து கடலைத் தொடுவதற்குள் நாக்கு தள்ளிவிடும். Four Wheel Drive என்று அங்கு அழைக்கப் படும் SUV (Sports Utility Vehicle) என்று இங்கு அழைக்கப் படும் வாகனங்கள் இருந்தால் மணலை அரைத்துச் சென்று கடல் நீரில் சக்கரங்கள் நனைய நிறுத்திக் கொள்ளலாம். என்ன ஒரு வாரத்திற்கு வண்டிக்குள் மீன் வாசனை அடிக்கும்! என்னுடைய சொனாட்டாவை நிறைய சோதிக்காமல் மலையடிவாரத்திலேயே நிறுத்திவிட்டு இறங்கிக்கொள்வோம். மணலைப் பார்த்ததும் குதூகலமாக ஓடத்துவங்கும் குழந்தைகள் மூன்றே நிமிடத்தில் ஓய்ந்து போய் "தூக்குப்பா தூக்குப்பா" என்று கெஞ்ச ஆரம்பித்து விடுவார்கள். சில்லென ஊடுருவிச் செல்லும் (காலை, மாலை வேளைகளில் மட்டும்) காற்றை அனுபவித்தபடி கடலை நோக்கி நடந்து செல்வது இனிய அனுபவம். கிட்டத்தட்ட அரை கி.மீ. நடந்ததும் கடலலைகள் கால்களை வந்து தழுவும். அந்த இடத்தில் எத்தனையோ ஆயிரம் ஆண்டுகளுக்கு முன்பு இருந்த மலையின் மிச்சங்களாக ஒரு மிகப்பெரிய பாறை இருக்கிறது. கிட்டத்தட்ட 50 அடி உயரமாவது இருக்கும். அந்தப் பாறை - குன்று - இங்கே:

குன்றின் கீழ்ப்புறம் தண்ணீரின் கறை தெரிகிறதா? High Tide காலங்களில் நீர்மட்டம் ஜிவ்வென்று ஐந்தடி கூடி இப்பாறை நீரில் மிதப்பதைப் போன்ற பிரமையைத் தரும். Low Tide காலங்களில் தண்ணீர் பின்வாங்கிச் சென்றுவிடும். அப்படிப்பட்ட சந்தர்ப்பத்தில் எடுத்த படம் என்பதால் கீழே மணல் தெரிகிறது.

இது அலைகளில் நின்று கொண்டு எடுத்த படம். சற்று கவனித்துப் பார்த்தால் பின்னணியின் ஓரத்தில் மலைத் தொடர்கள் லேசாகத் தெரியும். இப்பாறைக்கும் அம்மலைத் தொடர்களுக்குமான இடைவெளியே நடக்கவேண்டிய தூரம்!

2 comments:

KAANAGAM said...

Sundar..

Though I have roamed in Muscat with you for all the places it is amazing and interesting to read with aesthetically written article. you have seen all the muscat landscapes in purely poetic view.. mercury camera really worked hard for you. with that you have made a lot of wonders... keep it up and Greetings..

Jeyakumar. Doha - Qatar

"வற்றாயிருப்பு" சுந்தர் said...

Thanks Jeyakumar. I'm just replaying how it was recorded in my mind and I think with little effort everyone can write like this. You see a 'poetic view' because of the 'poet' in you!!

Hope to see you again in my blog.

Sundar.